नकारात्मक सर्किट ब्रेकर लागेर बन्द भएको सेयर बजारमा ७ अर्ब २० करोड रुपैयाँभन्दा बढीको कारोबार भएको छ । बजार ६% घटेपछि दिउँसो २ बजेर १३ मिनेट जाँदा कारोबार स्थगित गरिएको हो । 

नेप्से सूचक १२३.३४ अंकले घटेर १९३२.११ विन्दुमा आइपुगेको छ । केन्द्रीय बैंकले शुक्रवार मौद्रिक नीतिको समीक्षा सार्वजनिक गर्दै सेयर धितो कर्जाको वर्तमान व्यवस्थामा पुनरावलोकन गर्ने बताएपछि शेयरबजारमा पहिरो गएको हो ।

१ करोड ५४ लाख भन्दा बढी कित्ता सेयर कारोबार भएका छन् । कारोबार भएका सबै समूहका सूचक घटेका छन् । अन्य समूह सबैभन्दा धेरै ९.१३% ले घटेको छ । यसमा नेपाल टेलिकम तथा पुनर्बिमा लगायतका कम्पनीहरुको वर्चस्व छ । बिमा समूह, उत्पादनमूलक तथा व्यापारिक समूहहरुमा पनि भारी गिरावट आएको छ । 

वाणिज्य बैंक समूहको सूचक ६४.९ अंकले घटेको छ । खरिदबिक्री रकममा नेपाल पुनर्बिमा कम्पनी, नेपाल लाइफ इन्सुरेन्स तथा नेपाल टेलिकमको वर्चस्व रहेको छ । डेढ दर्जन कम्पनीको भाउ ९% माथि घटेको छ ।