मुकेश पोखरेल
नयाँ वर्ष २०७७ को पहिलो दिनको बिहानीमा संरक्षण क्षेत्रमा काम गर्ने र चासो राख्नेहरुका लागि आश्चर्यमिश्रित खुशी पार्ने समाचार थियो, डडेल्धुरा जिल्लाको २५०० मिटर उँचाइमा बाघ भेटिएको। किन पनि यो महत्वपूर्ण थियो भने, नेपालमा अहिलेसम्म त्यति उँचाइमा बाघ भेटिएको यो पहिलो घटना थियो।
तराई भू–परिधि (ताल) कार्यक्रमको प्राविधिक सहयोगमा जिल्ला वन कार्यालय डडेल्धुराले जिल्लाको महाभारत क्षेत्रमा वन्यजन्तुको रेकर्डका लागि राखिएको स्वचालित क्यामेराले बाघको तस्वीर कैद गरेको थियो। यो घटनापछि अहिले सुदूरपश्चिम प्रदेशमा महाकालीदेखि पूर्व र कर्णाली नदीदेखि पश्चिममा पर्ने महाभारत क्षेत्रलाई समेटेर नयाँ निकुञ्ज वा संरक्षित क्षेत्र घोषणा गर्नुपर्ने बहस शुरु भएको छ।
जिल्ला समन्वय समिति (जिसस) डडेल्धुराका प्रमुख गणेश भट्टका अनुसार, जिसस डडेल्धुरासहित जिल्लाका सबै पालिकाहरुले जिल्लाको महाभारत क्षेत्रमा पर्ने जंगललाई राष्ट्रिय निकुञ्ज वा संरक्षित क्षेत्र बनाउने विषय पालिका स्तरीय सभाबाट पारित गरेका छन्।
“बाघ भेटिएपछि हामीले यहाँको महाभारत जंगलको महत्व बुझ्ने अवसर पायौं”, भट्ट भन्छन् “संरक्षित क्षेत्र र निकुञ्ज बनाउने विषयमा सुदूरपश्चिम प्रदेशका सांसदहरुबीच छलफल चलाउँदैछौं।”
