लामो समयदेखि बन्द रहेको डोटीको दिपायल विमानस्थल र बैतडीको पाटन विमानस्थलबाट हवाई उडान पुनः सुरु भएको छ । धनगढीलाई बेस बनाएर शुक्रबारदेखि  हवाई उडान सुरु भएको हो ।

अबदेखि धनगढीबाट हरेक शुक्रबार बिहान १०ः३० मा उडान भर्ने समिट एयरले ११ः३० मा उडान भर्ने छ भने धनगढीबाट हरेक मंगलबार बिहान १० बजे बैतडीका लागि विमानले उडान भर्ने धनगढी विमानस्थलका प्रमुख तेजबहादुर बुढथापाले जानकारी दिए ।

बुढथापामा अनुसार धनगढीबाट १६ यात्रु लिएर आएको उक्त विमानले डोटीबाट ११ जना लिएर गएको र धनगढीबाट १८ यात्रु बैतडी  लिएर आएको र बैतडीबाट ७ यात्रु लिएर धनगढी फर्केको हो ।

हाललाई धनगढी-दिपायलको भाडादर तीन हजार दुई सय रुपैयाँ तोकिएको छ । विमानमार्फत डोटीदेखि धनगढी जाने यात्रुले दिपायलमा रहेको होटेल रिभरसाइडमा सम्पर्क गर्न सकिने समिट एयरले जनाएको छ । धनगढीबाट बैतडीको भाडा तीन हजार आठ सय रुपैयाँ तोकिएको छ। 

नियमित हवाई उडान भए पनि विमानस्थलमा टर्मिनल भवन तथा टावर नहुँदा समस्या हुने देखिएको छ । यसअघि १७ असोजमा यहाँका तीन विमानस्थल डोटीको दिपायल, बैतडीको पाटन र बझाङको देवल विमानस्थलमा परीक्षण उडान गरिएको थियो ।

परीक्षण उडानसँगै संस्कृति, पर्यटन तथा नागरिक उड्डयनमन्त्री योगेशकुमार भट्टराईसहितको टोलीले विमानस्थलको निरीक्षणसमेत गरेको थियो ।