प्रदेशसभाको दुई तिहाई मतले लुम्बिनी प्रदेशको स्थायी राजधानी दाङको देउखुरी क्षेत्र (भालुवाङ) पारित ग¥यो। प्रदेशका १२ वटै जिल्लाको भोगौलिक दुरी र ‘भर्जिन ल्यान्ड’मा राजधानी सहरको विकास गर्ने दलिलका साथ स्थायी राजधानी दाङ र अर्घाखाँचीको सीमा राप्ती नदीकिनारको मैदानी भाग देउखुरी क्षेत्रलाई तोकिएको हो।
सत्तासीन नेपाल कम्युनिस्ट पार्टी (नेकपा)का बुटवल र दाङपक्षीय नेताका कारण यो मुद्दा निकै पेचिलो बनेको थियो। तर कोरोना महामारीले जीवनमरणको दोसाँधमा रहेकै बेला मुख्यमन्त्री शंकर पोखरेल, नेकपा अध्यक्षद्वय केपी शर्मा ओली र प्रचण्डको सहमतीय दस्तावेजले सहजै दुई तिहाई बहुमतले दाङको देउखुरी क्षेत्र स्थायी राजधानीका रूपमा घोषणा भएको छ। राजधानी अर्थात् प्रशासनिक केन्द्र नतोकिएपछि बुटवलमा आक्रोश चुलियो। सदनमा विपक्षीको कुर्सी फालाफाल र सडकमा मुख्यमन्त्रीसवार गाडीलक्षित ढुंगा प्रहारसम्म भयो। दुई तिहाईभन्दा बढी मतले स्थायी राजधानी टुंगिएपछि बुटवल शान्त छ। तर ऐतिहासिक, सामरिक र राजनीतिक रूपमा स्थापित बुटवल फेरि एउटा अवसरबाट ठगिएको विश्लेषण गरिएको छ। साविक लुम्बिनीका ६ जिल्ला, भेरी र राप्तीका केही जिल्लाको समेत बुटवल केन्द्रमा छ।
