उजिर कार्की
झापाको कन्काई नगरपालिकामा गाँजा खाने क्रममा विवाद हुँदा एक युवाको हत्या भएको छ।
बुधबार २२ वर्षीय अभिषेक चौधरीको उनकै साथीले हत्या गरेका हुन्। हत्या अभियोगमा प्रहरीले सोही ठाउँका २२ वर्षीय टल्के भन्ने रविन राजवंशीलाई पक्राउ गरेको जिल्ला प्रहरी कार्यालय झापाका डीएसपी राकेश थापाले बताए।
रविनले बन्चरो प्रहार गरी अभिषेकको हत्या गरेको प्रहरीले जनाएको छ। मंगलबार राति साढे ९ बजे झापाको कन्काइ नगरपालिका ३ एकान्त टोलस्थित सुरुंगा खोलाको बाँध र बाँसघारीको बीचमा चौधरीको हत्या भएको थियो। चौधरीको शव बुधबार बिहान स्थानीयले फेला पारेर प्रहरीलाई खबर गरेका थिए।
रविन र अभिषेक लगायतका साथीहरुका बीचमा गाँजा खाने क्रममा झगडा हुँदा हत्या भएको प्रहरीको प्रारम्भिक अनुसन्धानबाट खुलेको छ।
प्रहरीका अनुसार मंगलबार साँझ रविन र अभिषेक लगायतका केही युवाहरु भेला भए। त्यसक्रममा उनीहरुले एक सय रुपैयाँ दिएर रविनलाई गाँजा किन्न पठाएका थिए। तर, रविनले गाँजा ल्याइसकेपछि उनलाई खान भने दिएनन्।
