आधुनिक जीवनशैलीले जन्माएको असन्तुलित आहारविहार र दिनचर्याको एउटा खराब नतिजा अनावश्यक मोटोपन भएको छ । त्यो मोटोपनबाट मुक्ति पाउनका लागि मानिसहरु विभिन्न उपायहरु अपनाउने गर्छन् । तीमध्ये एउटा उपाय हो– खानपानको पथपरहेज । यस सिलसिलामा सबैभन्दा चर्चामा आउने गर्छ – किटो डाइट । तर यो किटोडाइट पनि विवादमुक्त भने छैन । केही दिनअघिको कुरा हो– हिन्दी र बांग्ला फिल्मकी अभिनेत्री मिस्टि मुखर्जीको मृगौलाले काम गर्न बन्द गरेका कारण निधन भयो । २७ वर्षकी अभिनेत्री किटो डाइटमा रहेको र यसै कारण उनको स्वास्थ्यमा खराबी देखिएको मिस्टि मुखर्जीको प्रतिनिधिलाई उद्धृत गर्दै विभिन्न सञ्चार माध्यमले जानकारी दिएका छन् ।

अभिनेत्रीको मृत्यु साँच्चै नै किटो डाइटका कारण नै भएको हो भनेर आधिकारिक बयान सार्वजनिक भइसकेको छैन यद्यपि, उक्त घटनाले नकारात्मक कोणबाट नै भए पनि किटो डाइटलाई फेरि चर्चामा भने ल्याएको छ । त्यसो त किटो डाइट नेपालमा पनि लोकप्रिय बन्दै गएको छ । थुप्रै सञ्चारकर्मी, मोडल र विभिन्न व्यक्तित्वले पछिल्लो समय किटो डाइट अनुसरण गर्न थालेका छन् । यस्तोमा नायिका मिस्टिको मृत्युले धेरैले झक्झकाएको पनि हुनसक्छ । आखिर के हो त किटो डाइट ? के यसले साँच्चै नै मानिसको ज्यानै लिन सक्छ त ? यसबारे रातोपाटीले नेशनल हस्पिटल एण्ड क्यान्सर रिसर्च सेन्टर र बयोधा अस्पतालमा क्लिनिकल न्यूट्रिसनिष्टका रुपमा कार्यरत योगिता सापकोटासँग कुराकानी गरेको छ ।