१४औँ महाधिवेशनको तयारीमा जुटेको प्रमुख प्रतिपक्षी दल कांग्रेस नीतिमा होइन, नेतृत्वको बहसमा केन्द्रित छ । ०७४ को निर्वाचनमा अप्रत्याशित पराजय भोगेको कांग्रेसपंक्ति नीतिगत सुधारमा होइन, भावी नेतृत्वको अनुहारलाई लिएर दौडधुपमा लागेको छ ।
संविधान जारी गरेपछि चुनावमा हार खानुमा समयानुकूल आफूलाई बदल्न नसकेको कांग्रेसको निष्कर्ष थियो । तर, चुनाव सकिएको दुई वर्ष बित्दा पनि कांग्रेस नीतिगत सुधारमा केन्द्रित नभएको पार्टीभित्रै गुनासो छ । बरु, महाधिवेशनको मिति तयलगत्तै भावी नेतृत्वलाई लिएर कांग्रेसमा गुटगत संघर्ष सुरु भएको छ ।
सिंहदरबारको कामगराइप्रतिका गुनासालाई लिएर विपक्षी कांग्रेसले जोडदार आवाज नउठाएको आरोप छ । बरु, सरकारलाई सकारात्मक काम गर्न बाध्य पार्नुपर्ने र खबरदारी गर्नुपर्ने कांग्रेस आफैँ अलमलमा छ । पार्टी बदल्ने एजेन्डामा होइन भावी सभापति, उपसभापति र महामन्त्रीका लागि दाबेदार दिने एकपछि अर्को गर्दै खुल्दै जान थालेका छन् ।
