चीनका लागि अमेरिकी राजदूत टेरी ब्रानस्टाडले राजीनामा दिने भएका छन्।
ब्रानस्टाडले नोभेम्बर महिनामा अमेरिकामा हुन लागेको राष्ट्रपति निर्वाचनअगावै बेइजिङ छोड्ने अपेक्षा गरिएको सीएनएनले खबर लेखेको छ।
अमेरिका र चीनबीच अनेकौं मोर्चामा तनाव बढ्दै जाँदा यो घोषणा आएको हो ।
चीन सरकारले चीनमा रहेका वरिष्ठ अमेरिकी कूटनीतिकर्मी र अधिकारीमाथि थप नियन्त्रण लगाउने घोषणा शुक्रवार गरेको छ । वाशिङटनले सेप्टेम्बर ३ मा बेइजिङका कूटनीतिकर्मीमाथि त्यस्तै नियन्त्रण लगाएको थियो ।
सोमवारै अमेरिकाका परराष्ट्रमन्त्री माइक पोम्पेओले ब्रानस्टाडलाई अमेरिकी जनताको प्रतिनिधित्व गरेकोमा धन्यवाद दिएका छन् ।
पोम्पेओले ब्रानस्टाडको राजीनामाको कारण खुलाएनन् र उनको उत्तराधिकारीका बारेमा पनि केही बताएनन् ।
सन् २०१६ मा चुनाव जितेपछि ट्रम्पले राजदूत बनाएका आरम्भतिरका व्यक्तिमा ब्रानस्टाड पनि पर्छन् ।
त्यतिखेर उनी आयोवा राज्यका गभर्नर थिए र उनलाई सार्वजनिक नीति, व्यापार तथा कृषिमा अनुभवका साथै चीनका राष्ट्रपति सी चिनफिङसँगको लामो सम्बन्धका कारण राजदूत बनाइएको थियो ।
ब्रानस्टाडलाई राजदूत बनाइँदा बेइजिङले स्वागत गरेको थियो । त्यतिखेर चीनको परराष्ट्र मन्त्रालयका प्रवक्ता लु काङले उनलाई चिनियाँ जनताका पुराना मित्र भनेका थिए ।
तर ब्रानस्टाडको कार्यकालमा अमेरिका र चीनको सम्बन्ध बिग्रँदै गयो । अमेरिकाबाट फाइदा लुटेर चीनले प्रगति गरेको भनी ब्रानस्टाडले एक आलेख प्रकाशन गर्न खोज्दा पिपुल्स डेलीले छाप्न मानेको थिएन ।
