नेपालको अर्थतन्त्रमा महत्वपूर्ण योगदान गर्दै आएको व्यावसायिक घराना शंकर ग्रुपले नेपालमै टिभिएस मोटरसाइकल, स्कुटर तथा थ्री ह्वीलरको उत्पादन सुरु गरेको छ ।
नेपालमा टिभिएस बाइक तथा स्कुटर र थ्री ह्वीलरको मागर बजार बढ्दै गएपछि व्यावसायिक घराना शंकर ग्रुपले सिमरामा एसेम्बल्ड प्लान्ट राखेर उत्पादन सुरु गरेको हो । पछिल्ला केही वर्षयता टिभिएस मोटरसाइकल र स्कुटरमा युवा युवतीको ‘क्रेज’ अत्यधिक बढ्दै गएपछि नेपालमै एसेम्बल्ड फ्याक्ट्री खोलिएको ग्रुपका प्रबन्ध निर्देशक शाहिल अग्रवालले बताए ।
‘हाम्रो प्लान्टबाट मोटरसाइकल उत्पादन सुरु भएको छ । त्यसैगरी, स्कुटर र थ्री ह्वीलरको पनि केही समयभित्रै उत्पादन सुरु गर्ने तयारी छ,’ उनले भने, ‘मोटरसाइकल, स्कुटर र थ्री ह्वीलर गरी हामीसँग तीन ओटा लाइन छ । त्यसमध्ये अहिले मोटरसाइकलको उत्पादन सुरु भइसकेको छ ।’
