गत वर्ष चैत १६ गते केराउ, मरिचलगायत केही वस्तु आयातमा प्रतिबन्ध लगाएको सरकारले आफ्नो निर्णय संशोधन गरेको छ।
प्रतिबन्धको ५ महिनापछि उद्योग, वाणिज्य तथा आपूर्तिमन्त्री लेखराज भट्टको प्रस्तावमा आइतबार बसेको मन्त्रिपरिषद् बैठकले आफैँले यसअघि गरेको निर्णय उल्ट्याएको हो।
सरकारले प्रतिबन्ध लगाएसँगै चैत १६ अघि नै आयातको प्रक्रिया पुरा गरी भन्सारसम्म आएको मरिच तथा केराउलगायतका ८ सय कन्टेनर वस्तु रोकिनपुगेको थियो। आइतबारको निर्णयसँगै ती वस्तु अब नेपाल छिर्न पाउने भएका छन्।
सरकारले ब्यापारघाटा कम गर्ने उद्देश्यले मरिच, केराउ, छोकडा तथा ५० हजार डलर बढी मूल्यका गाडी आयात गर्न नपाउने निर्णय गरेको थियो। तर भन्सारमा आफूले सरकारी निर्णयअघि नै प्रक्रिया थालेर आयात गरेका वस्तुका कन्टेनर अलपत्र परेपछि व्यवसायीहरुले आपूर्ति मन्त्रालयमा दौडधूप बढाएका थिए। त्यसपछि केही वस्तु आयात गर्न दिए पनि बाँकी भन्सारमै अलपत्र अवस्थामा थिए।
