सत्तारुढ नेपाल कम्युनिस्ट पार्टी (नेकपा)भित्रको आन्तरिक विवाद उत्कर्षमा पुगेका बेला विवाद समाधान सुझाव कार्यदलको प्रतिवेदनले अध्यक्षसमेत रहेका प्रधानमन्त्री केपी शर्मा ओलीलाई बलियो बनाउने गरी सुझाव दिएको छ। कार्यदलले पार्टीको विधि पद्धतिलाई जोड दिएको भनिए पनि मंसिर ४ कै सम्झौताको व्याख्या गरेकाले अर्का अध्यक्ष पुष्पकमल दाहालको भूमिकाप्रति आशंका उब्जिएको छ। साथै, अध्यक्ष दाहालले अर्का अध्यक्ष ओलीसँग आत्मसर्पण या सम्झौता गरेको भन्ने आशंका उब्जिएको छ।  

‘अध्यक्ष कमरेड केपी शर्मा ओलीले प्रतिनिधिसभाको यो कार्यकालभर प्रधानमन्त्रीको जिम्मेवारीमा रहेर सरकारको नेतृत्व गर्ने र मूलतः सरकारको काममा केन्द्रित हुने, अध्यक्ष कमरेड पुष्पकमल दाहाल कार्यकारी अधिकारसहित मूलतः पार्टीका बैठकहरूको सञ्चालन, निर्णयहरूको कार्यान्वनय र समग्र पार्टी कामको जिम्मेवारीमा केन्द्रित हुने, अध्यक्षद्वयले पार्टी र सरकारबीचको काममा समन्वय गर्ने र संस्थागत रूपमा अघि बढाउने’ भन्ने विषय गत मंसिर ४ गतेकै समझदारीको व्याख्या भएकाले दाहालले तीन महिनादेखि पार्टीभित्र गरिरहेको विवाद के र कसका लागि भन्ने प्रश्न उठेको नेताहरू बताउँछन्।