डा. बाबुराम मरासिनी

अहिले कोरोना भाइरसको सङ्क्रमण समुदाय स्तरमा फैलिसक्यो । प्रहरी सङ्गठन, स्वास्थ्यकर्मी, विभिन्न टोल बस्तीहरूमा भित्रभित्र फैलिरहेको छ । कोरोना नियन्त्रणका लागि सुरुवाती चरणबाटै कमजोरीहरू भएका छन् ।

सुरुमा प्लेनबाट कोरोना आउँछ भन्नेमा मात्र सरकार केन्द्रित भयो तर दक्षिणबाट बस चढेर नेपाल भित्रियो । भारतबाट व्यापक मात्रामा मान्छे भित्रिँदा कोरोना पनि भित्रियो । गत चैत १० गते नेपाल पारि भएका भारतमै बस्ने, नेपालमा रहेका नेपालमै बस्ने जुन निर्णय भयो त्यो कार्यान्वयन हुन सकेन । त्यही निर्णय नै हाम्रा लागि अत्यन्तै त्रुटिपूर्ण बन्नपुग्यो ।

अवैध बाटोबाट नेपाल प्रवेश गर्न नसक्ने मान्छे मात्र सिमानामा बसे, सक्नेहरू मुख्य बाटो छोडेर जङ्गल चारैतिरबाट नेपाल पसे । त्यहीँबाट नेपालमा कोरोना फैलिन सुरु ग¥यो । पछि एक डेढ महिनापछि भारतबाट आउन दिने भनेर निर्णय सच्याउने काम त भयो तर उनीहरूलाई पहिले नै आउन दिएर क्वारेन्टिनमा राखेको भए हुन्थ्यो । क्वारेन्टिन पनि व्यवस्थित हुन्थ्यो, अलि अलि आउँदै क्वारेन्टिनमा बसेर घर जान्थे । यसले सङ्क्रण फैलिन पाउने थिएन । 

सरकारले सुरुमा भारतबाट नेपाल आउन दिएन । पछि एक्कै पटक सीमा खोलिदियो । भारतले पनि पछि गाडी र रेल चलाइदियो, मुम्बई, अहम्दावाददेखि ठूलो सङ्ख्यामा नेपालीहरू स्वदेश आइदिए । ती मान्छे कताकता पुगे उनीहरूबाट सबैतिर सङ्क्रमण फैलिँदै गयो ।