उन्नती चौधरी
कैलालीको घोडाघोडी नगरपालिका–७ की निर्मला चौधरी (२८) अहिले डेरी चलाउँछिन्। पढ्न र व्यवसाय गर्न आफ्नै परिवारसँग विद्रोह गरेकी उनलाई डेरी खोलेपछि पनि ‘थारुले महीनावारी बार्दैनन्, यसको पसलको दूध कसले खान्छ?’ भनेर हल्ला चलाए। तर, निर्मलाले हिम्मत हारिनन्।
केटाकेटीदेखि नै उनको आत्मविश्वास बलियो थियो। ११ वर्षको हुँदा बुबाको मृत्यु भयो। आमा रामललिया डगौरालाई ३२ जनाको संयुक्त परिवारको नेतृत्व गर्नुपर्ने जिम्मेवारी थपियो। परिवारका सबै काममा जोतिनुपर्थ्याे।
समाजमा ‘छोरीलाई पढाउनु हुन्न’ भन्ने धारणा थियो। त्यसमाथि खान, लाउनै समस्या। कक्षा ५ पुगेपछि दाइले विद्यालय नजान उर्दी जारी गरे। तर, निर्मलाले अटेर गरिन्। बरु आफ्ना दुःख शिक्षकलाई बताइन्। उनले कापी, किताब किन्न सहयोग गरे।
उनी दुःखै दुःखमा १० कक्षा पुगिन्। एसएलसी उत्तीर्ण गरेपछि ५० प्रतिशत छात्रवृतिमा ‘प्लस टु’ पढ्न पाइन्। त्यही वेला जिल्ला शिक्षा कार्यालय अन्तर्गत सामुदायिक सिकाइ केन्द्रद्वारा सञ्चालित प्रौढ कक्षा पढाउने अवसर मिल्यो। त्यसबापत महीनाको रु.३ हजार तलब पाउन थालेपछि कापी कलम किन्ने समस्या टर्याे ।
