काठमाडौं: सरकारले कोभिड १९ को संक्रमण नियन्त्रणका लागि पालना गर्नुपर्ने जनस्वास्थ्य मापदण्ड पालना नभएको बताएको छ।
नेपाल स्वास्थ्य अनुसन्धान परिषद्ले गरेको अध्ययनले मापदण्ड पालना नभएको देखाएको हो। परिषद्का सदस्य सचिव डा. प्रदीप ज्ञवालीले काठमाडौंका २३ वटा सार्वजनिक स्थलमा गरिएको अवलोकनमा मापदण्ड पालना नभएको बताए।
स्वास्थ्य तथा जनसंख्या मन्त्रालयको नियमित प्रेस ब्रिफिङमा उनले ४५ सय २ जनामा अध्ययन गर्दा ७२.१ प्रतिशतले मात्रै मास्क लगाएको बताए। यस्तै कपडाको मास्क लगाउने १५. ८ प्रतिशत छ भने २७ सय ३ जना मध्ये ७२. ६६ प्रतिशतले मात्रै सहि तरिकाले मास्क लगाएको भेटिएको छ। यस्तै २७.३४ प्रतिशतले राम्ररी मास्क नलगाएको पाइएको हो। '२७.३४ प्रतिशतले चिउडोमा, घाँटीमा लगाउँदा तथा नाक मुख नछोपिने गरी लगाएको भेटिएको छ,' उनले भने।
२ मिटरको सामाजिक दुरी ३१.२ प्रतिशत ठाउँमा मात्रै पालना गरिएको भेटिएको छ। ६० प्रतिशत सार्वजनिक स्थलमा मात्रै साबुन पानीको ब्यवस्था गरिएको देखिएको छ। अस्पतालको चमेना गृहमा भने सामाजिका दुरी पालना नै नगरिएको ज्ञवालीले बताए।
२० प्रतिशत अस्पतालमा मात्रै सामाजिक दुरी कायम भएको तथा ५० प्रतिशत भन्दा कम सार्वजनिक सवारीमा मात्रै एक सिटमा एक जना बस्ने ब्यवस्था गरिएको पाइएको छ। उनले जनस्वास्थ्यका मापदण्ड पालना नभएको बताए। 'जनस्वास्थ्यका मापदण्ड जनमानसमा प्रभावकारी पालन भएको पाइएन,'उनले भने।
