विदेशमा रहेको दाजुमा कोरोना पोजेटिभ देखियो। गर्दागर्दैको काम, पाउँदा-पाउँदैको तलब नेगेटिभ भयो। दाजु डरायो। तर आफूलाई कोरोना लागेको कुरा नेपालमा भाउजूलाई सुनाएन।
जो मान्छे माया गर्न जान्दछ, उसले आफूले माया गर्ने मान्छेलाई कुन दुःख देखाउने, कुन दुःख लुकाउने भन्ने राम्ररी जान्दछ।
दाजु जान्दथ्यो, उसको कोरोना केही हप्तामा ठीक हुन्छ। तर उसले आफ्नो रोग भाउजूलाई सुनाउने हो भने, भाउजूको मनमा लाग्ने रोग चाहिँ ऊ आफैं फर्केर नेपाल नआउन्जेल ठीक हुने छैन। अनि ऊ अहिल्यै नेपाल फर्किहाल्न मिल्दैन। अहिले कमाउन छाडेर फर्केर आयो भने ऊ एक जनालाई कोरोना मात्रै लागेको छ, बाँकी परिवारलाई कोरोनाबाहेक सबै रोग लाग्नेछ।
