खबरदार पढ्न थाल्नु भो कि के हो? अहँ पढ्दै नपढ्नुस्। तपाईंलाई फुर्सद कहाँ छ र पढ्न? बिहानै उठ्यो अनि सामाजिक सञ्जालमा एक दर्जन ‘ह्याप्पी बर्थ डे’ लेख्नै पर्यो। फेरि अलिअलि समवेदना र श्रद्धाञ्जलि पनि थप्नै पर्यो।
यसो ‘कम्बट’मा बसेर १०-२० ‘लाइक’ ठोक्नै पर्यो। हिजो दुईचार वटा कडा गाली मिसाएर लेखेको ‘स्टाटस’ ले कति लाइक पायो, सेयर भयो कि भएन? त्यो पनि त जाँच्नु पर्यो। अनि पढ्ने कति बेला? म पनि तपाईं जस्तै अनपढ हो।
र, यो लेख पढिहाल्नु भो भने पनि दिमागमा खासै लोड पर्दैन, किनकि म तपाईंकै पक्षमा छु- पढ्नु त हुँदै हुँदैन। र, विश्वास गर्नुस् बहुमत हाम्रै छ।
पढ्नु भनेको अहिलेको जमानामा सबैभन्दा ठूलो गल्ती हो। पढ्ने ठेक्का त गोडा दुई दर्जनले लिएकै छन्। उनीहरूले जे बोल्छन् र भन्छन् त्यही ठीक र बेठीक भन्ने बस् यत्ति काम हो तपाईंको। तपाईं त बाठो नि!
