श्यामप्रसाद मैनाली
माओवादी केन्द्र र एमाले नामका दुई कम्युनिस्ट पार्टीबीच संसदीय निर्वाचनमा भएको गठबन्धनले उल्लेख्य बहुमत प्राप्त गरेर सरकार बनायो । त्यसपछि यी दुई दलबीच एकीकरण भएर नेपाल कम्युनिस्ट पार्टी (नेकपा) नामको दल बन्यो । त्यस दलले सरकार चलाएको पनि साढे दुई वर्ष बितिसकेको छ ।
अहिले नेकपाभित्र शक्ति संघर्षले चरम रुप लिँदा दल नै विभाजित हुनेसम्मको शंका बढेको छ । यस गठबन्धनले निर्वाचनमा सचेत मतदातालाई समेत दिग्भ्रमित बनाउने अभिव्यक्ति र घोषणा पत्र प्रस्तुत गरेको थियो । उनीहरूलेआफूलाई वामपन्थी, कम्युनिस्ट, लोकतन्त्रवादी, समाजवादी, सुधारवादी, विकासवादी आदि सबै बनाउन खोजेका थिए । यसरी मतदातालाई भ्रममा पार्न खोजिएको छ । अन्य विषयमा धेरै छलफल गर्नु नपर्ला तर यो पार्टी ‘वामपन्थी’ कि ‘कम्युनिस्ट’ भन्ने विषयमा भने नेकपाले प्रष्ट गर्न सकेको छैन । त्यसैले यस आलेखमा यी दुई सिद्धान्तबीचको पृथकताको बारेमा छलफल गर्ने प्रयास गरिएको छ ।
