म अक्सर आकाशमा उडेको सपना देख्छु। चिलले झैं जमिनमा हेर्दै अनि हावामा बाँकटे हान्दै निकै माथि माथि, यता र उता उडेको। दिशा बदल्न ज्यानलाई ढाडबाट मरक्क मर्काएको। अनि नमस्ते मुद्रामा दुई हात जोडेर 'डाइभ' हानेको। अन्तमा एकदमै होसियारी साथ भुइँमा अवतरण गरेको।
अक्सर ती सपनामा म उत्तीसका निकै अग्ला रुखका हाँगा लछार्दै भुइँमा झर्छु। नझरुन्जेल भुइँमा बजारिने चिन्ताले सताइरहेको हुन्छ। तर हरेकपल्ट विना चोटपटक म भुइँमा उत्रिन्छु र सन्तुष्टिको सास फेर्छु।
त्यस्तो सपना चल्दै गर्दा वा सकिए लगत्तै निद्रा खुलिहाल्यो भने त्यसका हरेक दृश्य मनमा ताजा हुन्छन्। अनि ती दृश्यलाई ओल्टाइ पल्टाइ गरेर म फेरि धेरै बेर ननिदाई आनन्द लिइरहन्छु। तत्काल निद्रा खुलेन भने चाहिँ बिहान हो कि हैन जस्तो गरी सपनाको धमिलो सम्झना मात्रै बाँकी रहन्छ।
