भारतको सुरतबाट फर्किदै गरेका धनुषाका ३० वर्षीय वीरेन्द्र यादव भोक र प्यासका बीच लड्दैपड्दै जटही नाकासम्म आइपुगे। तर घरमा उनका लागि पर्खिरहेकी ६ महिनाकी छोरी, छोरा र पत्नीलाई नभेटी उनको निधन भयो।
वीरेन्द्रका कान्छा भाइ धिरेन्द्र यादवका अनुसार सुरतबाट आउँदै गरेका वीरेन्द्र चिउरा, भुजा खाएरै लगभग ६ दिनपछि भारतको दरभंगासम्म पुगे। त्यतिबेलासम्म उनको अवस्था नाजुक भइसकेको थियो। उनीसँगै १०/१२ जना अरु नेपाली पनि थिए। उनीहरुले धिरेन्द्रलाई दाइको अवस्थाबारे फोन गरेर जानकारी गराए र एम्बुलेन्स लिएर दरभंगासम्म आउन भने।
धिरेन्द्र भन्छन्, ‘त्यति बेला रातिको लगभग १० बज्दै थियो। हामीले दाइसँगै रहेका उनका साथीहरुलाई जसरी भएपनि उतैबाट एम्बुलेन्स गरेर धनुषाको जटही नाकासम्म आउनका लागि आग्रह गर्याैँ। बरु जति पैसा लागेपनि केही छैन तर लिएर आउनुस् भनेर आग्रह गर्याैँ। उहाँहरुले त्यसै गर्नुभयो। दाईलाई लिएर लगभग राती १२/१ बजेको समयमा उहाँहरु पनि पुग्नुभयो र हामी पनि जटही नाका पुग्यौँ।’
