प्रधानमन्त्री केपी शर्मा ओलीले सर्वदलीय बैठक आह्वान गरेका छन्।
साँझ ५ बजे प्रधानमन्त्री निवास बालुवाटारमा बस्ने बैठकमा संसदमा प्रतिनिधित्व गर्ने राजनीतिक दलका प्रमुखहरुलाई बोलाइएको प्रधानमन्त्रीका प्रेस सल्लाहकार सूर्य थापाले बताए।
बैठकमा कोभिड १९ रोकथाम र नियन्त्रण तथा संविधान संशोधनको विषयमा छलफल गरिने उनले बताए।
‘कोभिड १९ महामारी विरुद्धको लडाईंको हालसम्मको अवस्था र अबको सरकारका कदमबारे जानकारी लिन र राजनीतिक दलहरुबाट सुझाव लिन सर्वदलीय बैठक बोलाइएको हो,’उनले भने।
बैठकमा लिम्पियाधुरासहितको नक्सा पारित गरिसकेपछिको अवस्था,भारतसँग संवाद र निशान छाप परिवर्तनका लागि संविधान संशोधन विधेयक पेश गरिसकेको अवस्थामा सर्वसम्मत रुपमा सो विधेयक पारित गर्ने बारेमा पनि छलफल हुनेछ।