नेपाली चलचित्र क्षेत्रका सदाबहार अभिनेता हुन् भुवन केसी । रिल लाइफमा थुप्रै अभिनेत्रीसँग रोमान्स गरेका केसीको रियल लाइफमा पनि रोमान्सका किस्साहरु त्योभन्दा कम छैनन् । ४ दशक कलाकारिताको यात्रामा बिताएका केसीको यो क्षेत्रमा नायक, निर्माता र निर्देशकको परिचय बनेको छ । करिब आधा दर्जनभन्दा बढी फिल्मसमेत निर्माण गरेका केसीले केही फिल्म निर्देशन पनि गरेका छन् । केसी जोडिएका अधिकांश फिल्मले चर्चा र सफलता दुवै हात परेको देख्न सकिन्छ । पछिल्लो समय चलचित्र विकास बोर्डको अध्यक्ष पदको दौडमा रहेका केसी बाठा कलाकारको रूपमा समेत परिचित छन् ।
कोरोनाको कहरका कारण करिब दुई महिनादेखि देशमा जारी लकडाउनका कारण सर्वसाधारणझँै उनी पनि घरभित्र थुनिएर बसेका छन् । समाचार, फिल्म हेर्ने र घरको सामान्य काम सघाउने उनको अहिलेको दैनिकी हो । कतिपय कलाकारले लकडाउन सदुपयोग गर्दै नयाँ नौलो सिर्जनामा समेत लगाएका छन् । केसीले भने लकडाउनले आफ्नो तनाव मात्र बढाएको बताउँछन् । यिनै अभिनेता भुवन केसीको शब्दमा यस्तो छ उनको लकडाउन डायरी :
