कपिल भण्डारी 

औषत हामी नेपालीको आदत नै भैसक्यो सबै कुरालाई हामी नकारात्मक नै देख्छौँ । गलत व्याख्या गर्ने, राम्रा पक्ष भन्दा नराम्रा पक्ष धेरै देख्ने, टिका टिप्प्णीमा धेरै जानकार आफूलाई नै मान्छाैँ । त्यसमा पनि महिनाैँदेखि लकडाउन छ, परिस्थिति फरक छ ।

सबै दैनिकी व्यवसाय दाउमा राखेर घरभित्रै सीमित छाैँ । त्यसैले पनि नकारात्मक साेच बढाएकाे हाेला । अछुतो कहाँ छु र म पनि ‘नेगेटिभिटी’को मामलामा । म पनि यहीँको पानी पिउँछु, यहीँको हावा अनि यहीँको माटोमा खटिएकाे छु । यहीँकाे धर्तीमा पसिना खर्चिन्छु पापी पेट र आफ्ना आवश्यकताका लागि ।

तर विडम्बना आज महिनौँदेखि घरभित्र गुप्तबास छु । निरिह र काँतर भएर बाँचेकाे छु । आफ्ना नित्य कार्यहरु सबै ठाउँमा राखेर निरीह भएर बाँचेको अवस्थामा श्रीमती जीको चाहना घर धन्दा चुलोमा केही मद्दत मिलोस् । छोरीको चाहना सँगै आफू जस्तै बनिदेओस्, खेलिदेओस्, चलिदेओस् ।