न छाडौं है सही सोच्न, नसोचौं अन्यको क्षति॥
मनको स्वच्छताले नै, हुन्छ हाम्रो समुन्नति॥
-१

नकारौं सर्व द्वेषादि, जगाऔं धर्ममा मति॥
सत्कर्ममा लगाऔं है, ऊर्जा हाम्रो भए जति॥
-२

जनास्थामा टिकेको छ, धर्म संस्कार बन्धन॥
अन्धविश्वास त्यागेर, स्वीकारौं परिवर्तन॥
-३

व्यतीत भैसक्यो भूत,भविष्य अनजान छ॥
कार्यको पूर्णता-हेतु, हातमा वर्तमान छ॥
-४

जन्म मृत्यु जरा व्याधि, लागेका छन् पछिपछि॥
हाम्रो पछि उनी लागून्, नलागौं उनको पछि॥
-५

सत्य नै विजयी हुन्छ, छैन शङ्का यहाँ रति ।।
सत्यमा भिन्नता छैन, पाइन्छ शरणागति॥
-६

सर्वे भवन्तु सुखिन: