सोमबार साँझ पौने पाँच बजे गायक जीवन शर्माले फोनमा सुनाए, ‘गीत लेख्दै छु।’ उनको गीतको सन्दर्भ ‘कोरोनापछि देशको हालत के होला’ भन्ने छ। गीत लेख्ने सुर उनलाई फ्याट्ट आएको हो, ‘म त्यस्तो गीत लेख्न भनेर सोचेर बस्ने मानिस होइन, मनमा आयो लेखिहाल्छु। मन लागेन छोडिहाल्छु।’
लेखेको कुरालाई सम्पादन गर्ने, पुनर्लेखन गर्ने उनको स्वाभाव कहिले पनि भएन। जति आउँछ, सर्सर्ती लेख्यो छोडिदियो। आफ्नो बानी व्याख्या गर्दै उनी भन्छन्, ‘म अलि अराजक किसिमको छु, बजाउने, गाउने समय पनि निश्चित छैन। मै निश्चित समय भएको मानिस हैन। रुटिनमा बस्दिनँ। ’
लकडाउनले ४४ दिन नाघिसकेको छ, बाहिर वातावरण ठप्प छ। यो समयमा पनि उनी संगीत सिर्जनामा लागिरहेका छन्, गीत बनाइरहेका छन्, संगीत भरेर त्यसलाई सामाजिक सञ्जालमा पोस्ट गरिरहेका छन्। उनी समय सान्दर्भिकतालाई पच्छ्याइरहेका छन्, परिस्थितिसँग अपडेट छन्, ‘अरुले कोरोना सम्बन्धी के–के गीत गाएका छन् भनेर सुन्ने गरेका छु।’
