लकडाउन अवधिमा सकेसम्म विज्ञानकेन्द्रित लेख लेख्न म तल्लिन थिएँ। यसैबीच प्रधानमन्त्री केपी शर्मा ओलीले मुख्यमन्त्रीहरूलाई दिएको निर्देशनको भिडियो टेप सार्वजनिक भयो। आफूलाई सम्पूर्ण ठान्ने अनि विज्ञानलाई गुमराह गर्ने ओली वचन र भाइरससँग तुलना गरेर ‘अब यो गीता ज्ञानतिर जानुपर्ने खतरा हुन्छ’ भन्ने ओली कथन सुनेर म झस्किएँ। यसरी अरूको आस्थालाई खतरा भन्दै ठट्टा गर्दा उत्पन्न हुनसक्ने खतराबारे ओली गम्भीर छैनन्। वैशाख ८ गते बिहान १० बजेतिर एकजना प्रधानसम्पादकलाई फोन गरेर प्रधानमन्त्री केपी ओलीले संयम गुमाएको हुँदा लोकतन्त्रमाथि घात गर्ने कदम चाल्दैछन् भन्ने धारणा सुनाएँ। साँझ पर्दा नपर्दै दुइटा अध्यादेश मन्त्रिपरिषद्ले पारित गरी राष्ट्रपतिबाट झटपट जारी भएको खबर आगोसरी फैलियो। त्यो प्रतिगमनउन्मुख कदम थियो तसर्थ त्यसको विरुद्घ मेरो विचार सार्वजनिक भयो।
दुइटा प्रतिगामी अध्यादेशको कम्पपछि लोकतन्त्रको मूल्यमान्यतालाई क्षतविक्षत् बनाउँदै दर्जन बढी परकम्पहरू गए। ‘दलफोड अध्यादेश’ को मूल उद्देश्य विपक्षी दलहरूलाई तोडफोड गर्नुका साथै सत्तारुढ नेकपाको विभाजनलाई पनि सहज तुल्याउने नियतले प्रेरित थियो। त्यसैले विपक्षी दलहरूका साथै नेकपाको सचिवालय बैठकमा ठूलो म्याग्निच्युडको परकम्प गयो। नेकपाका २० जना नेताले तत्काल स्थायी समिति बैठक बोलाउन माग गरे। ‘संवैधानिक परिषद् तोडमरोड अध्यादेश’ को मूल उद्देश्य संवैधानिक निकायहरूमा चाँडोभन्दा चाँडो आफ्ना अनुयायीलाई भर्ती गर्नु र विपक्षी÷आलोचक सिध्याउने दुर्नियतले प्रेरित थियो।
