चीनले विश्व स्वास्थ्य संगठन (डब्ल्यूएचओ)लाई थप ३ करोड अमेरिकी डलर दिने घोषणा गरेको छ ।

 चीनले कोरोना भाइरसविरुद्धको लडाइँका लागि यो सहयोग लिन लागिएको बताएको छ ।

यसअघि अमेरिकी राट्रपति डोनाल्ड ट्रम्पले डब्ल्यूएचओलाई पक्षपात गरेको आरोप लगाउँदै उसलाई अहिलेसम्म दिँदै आएको सहयोग रोक्ने निर्णय गरेको थियो । तर त्यसको केही समयपछि चीनले सहयोग गर्ने घोषणा गरेको हो ।

चिनियाँ विदेशमन्त्री कङ शुआङले यसअघि नै दुई करोड डलर सहयोगमा अहिलेको तीन करोड डलर थप सहयोग दिन लागिएको बताएका हुन् । यसले विश्वका मुलुकको स्वास्थ्य प्रणाली बलियो बनाउन सहयोग पुग्न सक्ने बताइएको छ ।

अमेरिकी राट्रपति ट्रम्पका अनुसार वार्षिक रुपमा अमेरिकामा कर तिर्ने मानिसहरुले डब्ल्यूएचओलाई ४० देखि ५० करोड डलर दिँदै आएका छन्। चीनले भने केवल चार करोड डलर मात्र सहयोग गर्दै आएको छ ।

अहिले विश्वभर महामारीको रुप लिइरहेको कोरोना भाइरस सबैभन्दा पहिला चीनको वुहानमा देखिएको थियो । ट्रम्पले डब्ल्यूएचओले चीनसँग मिलेर स्तविक तथ्यांक लुकाएको र समयमा नै सूचित नगरेको आरोप लगाउँदै आएको छ।  

यता डब्ल्यूएचओले भने महामारीको विषयमा वास्तविक तथ्यांक लुकाएको पश्चिमा मुलुकको आरोपलाई अस्वीकार गर्दै आएको छ । उसले कसैलाई पक्षपात नगरेको पनि बताउँदै आएको छ ।