वैशाख ५ गते प्रधानमन्त्री केपी ओलीले मन्त्रिपरिषद बैठक बोलाए। त्यहाँ कोरोनाविरूद्ध लड्न गठन गरिएको उच्चस्तरीय संयन्त्र र सुरक्षा अंगका मानिसहरू पनि उपस्थित थिए।
लामो छलफलपछि प्रधानमन्त्रीले निर्देशन दिए— लकडाउन कडाइसाथ पालना गराउने। जो जहाँ छ, त्यहीँ राख्ने। राजमार्गमा हिँडेकालाई जहाँ पुगेका छन्, स्थानीय निकायले त्यहीँ राख्ने र खुवाउने व्यवस्था गर्ने। साना-ठूला सहरमा बसिरहेका, दैनिक रोजगारी गरेर जीविका चलाउनेहरूलाई भोकै पर्न नदिने, खाना खुवाउने।
वैशाख ७ गते साँझ भक्तपुरमा भने अर्कै दृश्य देखियो।
त्यहाँ रोल्पा, रुकुमका तीन-चार सय मान्छे भेला भएका थिए। उनीहरू रामेछाप, दोलखा, सिन्धुपाल्चोक लगायत जिल्लाबाट हिँड्दै घर जान भक्तपुर आइपुगेका हुन्। उनीहरूलाई घर लैजान करिब आधा दर्जन गाडी तैनाथ थिए। सिमसिमे पानीमा छाता ओडेर उनीहरूलाई घर पठाउने कामको संयोजन गर्दै थिए— मन्त्री वर्षमान पुन। साथमा थिए भक्तपुरका सिडिओ र प्रहरी अधिकृतहरू।
