विश्व कोरोना भाइरस (कोभिड–१९)को महामारीका बीच एक महिना लामो लकडाउन घोषणा गरेको सरकारलाई बजार व्यवस्थापनमा निकै कठिनाइ पर्न थालेको छ । मुलुक लकडाउनको करिब एक महिना वितिसक्न लाग्दा बजार व्यवस्थापन तथा आपुर्ति व्यवस्थालाई लिएर सरकारमाथि थप चुनौती थपिएको हो । लकडाउन लम्बिदै जाँदा खाद्यान्न लगायतका दैनिक उपभोग्य वस्तुको आयात, वितरण र बजार व्यवस्थापनमा सरकारलाई हम्मेहम्मे पर्न थालेको छ । यतिखेर सरकारी ढुकुटीमा रहेको खाद्यान्नको भण्डारण (स्टक) रित्तिदै जान थालेको छ ।
पछिल्लो तथ्याङ्क अनुसार अहिले सरकारसँग २० हजार मेट्रिकटन चामल, ५५० क्वीन्टल दलहन(दाल), १६० मेट्रिकटन नुन र करिब ६ हजार मेट्रिकटन चिनी मात्र स्टक छ । नुनबाहेक चामल, दाल, नुन तेल र चिनीको अवस्था अत्यन्त नाजुक रहेको छ । अब यी वस्तुहरुको आपूर्ति व्यवस्थापन तत्काल नभए बजारमा भयाभहको अवस्था आउने देखिन्छ ।
