सुरेन्द्र पौडेल
नेपाली सेनाले कोरोना भाइरस सङ्क्रमणको उपचार, नियन्त्रण तथा रोकथामका लागि आवश्यक पर्ने मेडिकल सामग्री चीन र भारतबाट खरिद गर्ने भएको छ।
‘जिटुजी’ प्रक्रियाबाट मेडिकल सामग्री खरिद गर्न पाँच देशसँग पत्राचार गरिएको भए पनि चीन र भारतबाट मात्र जवाफ आएपछि तत्काल चाहिने सामग्री खरिद प्रक्रिया अघि बढाइएको हो।
‘हामीले चीन, भारत, दक्षिण कोरिया, सिङ्गापुर र इजरायलसँग मेडिकल सामग्री खरिद गर्न पत्राचार गरेका थियौं। चीन र भारतले जवाफ दिएका छन्। दक्षिण कोरियाले केही कम्पनीको नाम पठाएको छ भने सिङ्गापुर र इजरायलबाट जवाफ आएको छैन,’ नेपाली सेनाका प्रवक्ता तथा सहायकरथी विज्ञानदेव पाण्डेले नेपालन्युजसँग भने।
मेडिकल सामग्री खरिद प्रक्रिया अघि बढाइरहेको नेपाली सेनालाई चीन र भारतले ती सामग्री उपलब्ध गराउन सकिने बताएका छन्। चीनले ग्वान्जाओमा र भारतले नयाँदिल्लीस्थित नेपाली दूतावासमा मेडिकल सामग्री जम्मा गरिदिने प्रतिबद्धता जनाएका छन्। चीनले भ्यान्टिलेटर भने तुरुन्त उपलब्ध गराउन नसक्ने जानकारी दिएको छ।
