इटालीमा लकडाउनको समय मे ३ सम्मका लागि लम्ब्याइएको छ।
इटालीमा मार्च ९ मा पहिलोपटक मुलुकमा लकडाउनको घोषणा गरिएको थियो। यो लकडाउन अप्रिल ३ सम्मका लागि घोषणा गरिएको थियो।
तर अझै पनि इटालीमा कोरोना भाइरसको महामारी नरोकिएको कारण इटालीका प्रधानमन्त्री गिउसेपे कोन्टेले लकडाउनको समय मे ३ सम्मका लागि बढाउने निर्णय गरेका हुन्।
बीबीसीका अनुसार इटालीमा लकडाउनले संक्रमित र मृत्यु हुनेको संख्यामा पनि असर देखिन थालेको छ। शुक्रबार सार्वजनिक गरिएको तथ्यांक अनुसार इटालीमा पछिल्लो २४ घण्टामा पाँच सय ७० जना मानिसको भाइरसको कारण मृत्यु भएको थियो।
यो पछिल्लो एक सातायताकै कम हो। तर, इटाली विश्वमा कोरोनाबाट मृत्यु हुनेमा सबैभन्दा प्रभावित मुलुक हो। अहिलेसम्म १८ हजार आठ सय ४९ जना मानिसको यो भाइरसको कारण मृत्यु भइसकेको छ।
