कोरोनाभाइरस (कोभिड–१९) को संक्रमण र लकडाउनबाट प्रभावितहरुलाई राहत पुर्याउने भन्दै सरकारले आइतबार केही कार्यक्रमहरु घोषणा गर्यो । खासगरी बैंक तथा वित्तीय संस्थाबाट ऋण लिएका उद्योगी व्यवसायीलाई सहयोग पुग्नेगरी नेपाल राष्ट्र बैंकले केही कार्यक्रम घोषणा गर्यो ।सोही साँझ मन्त्रिपरिषद्को बैठकले दैनिक जनजीवनसँग जोडिएका केही कुराहरुमा महत्वपूर्ण निर्णय लियो । उक्त निर्णयलाई सरकार आफैंले ‘राहत प्याकेज’ भनेर घोषणा त गरेन । तर, अर्थमन्त्रीले ‘केही महत्वपूर्ण निर्णय’ भन्दै निर्णयको फाइल खोलेका थिए ।
आम जनताको सरोकारसँग जोडिएको विषय भएको र यसबाट जनताले केही न केही राहत महशुस गरेकोले यसलाई सबैले ‘राहत प्याकेज’ नै भने । सरकारको उक्त घोषणाले एकसरो रुपमा भने पनि सबैलाई छुने प्रयास गरेको छ ।
