कोरोना भाइरस संक्रमणको जोखिमप्रति सतर्कता अपनाउँदै नेकपा शीर्ष नेताहरू निवासबाहिर नगई ‘सेल्फ क्वारेन्टाइन’मा बसिरहेका छन् । सरकारले सार्वजनिक भेला, बैठक मात्र होइन, अन्तर्राष्ट्रिय हवाई उडानदेखि लामो दूरीको सवारी यातायातमा समेत रोक लगाएर नागरिकलाई कम्तीमा दुई साता ‘सेल्फ क्वारेन्टाइन’मै रहन आग्रह गरेका वेला नेकपा शीर्ष नेता पनि त्यसकै अनुसरण गर्न थालेका हुन् ।
नेकपा अध्यक्षद्वय प्रधानमन्त्री केपी शर्मा ओली र पुष्पकमल दाहाल ‘प्रचण्ड’सहित नौ सदस्यीय सचिवालयका सबै नेताहरू ६० वर्षमाथिका छन् । उनीहरूमध्ये ७० वर्ष उमेर पार गरेका दुई नेता छन् । ७२ वर्षीय उपाध्यक्ष वामदेव गौतम पार्टीमा सक्रियमध्ये ज्येष्ठ उमेरका नेता हुन् । त्यस्तै, वरिष्ठ नेता तथा पूर्वप्रधानमन्त्री झलनाथ खनाल ६ चैतबाट ७१ वर्षमा प्रवेश गरेका छन् ।
