विश्व अर्थतन्त्रमा नै संकट निम्त्याएको कोरोनाभाइसको महामारी कारण नेपाली अर्थतन्त्र पछाडी धकेलिएको विज्ञहरुले औँल्याएका छन् । यो महामारी तत्काल नियन्त्रणमा आए पनि देशको अर्थतन्त्र साइजमा आउन कम्तीमा एक डेढ वर्ष लाग्ने र माहामारीकै रुपमा फैलिरहे यसले देशलाई कैयौँ वर्षपछि धकेल्ने अर्थविद् डा. बिमल कोइराला बताउँछन् । उद्योगधन्दा, कलकारखाना, उत्पादन तथा सेवा क्षेत्र सबैमा भाइरसले प्रत्यक्ष असर पारेको छ । रातोपाटीसँग कुरा गर्दै डा. कोइराला सरकारले लिएको साढे ८ प्रतिशत आर्थिक वृद्धि दरलाई कोरोनाले धक्का दिएको बताउँछन् ।
‘कच्चा पदार्थ नआउँदा उद्योगले पूर्णरुपमा काम गर्न सक्दैन, जसका कारण कामदारको काम बन्द भइ उनीहरुको रोजीरोटीमा समेत प्रभाव पार्नेछ,’ उनले भने । उनका अनुसार देशमा गरिबीको संख्या बढ्ने छ । राष्ट्रिय योजना आयोगका अनुसार हाल नेपालमा गरीबीको रेखामुनि रहेको जनसंख्या १८.७ प्रतिशत छ । यो संख्या बढ्न सक्ने कोइरालाको अनुमान छ ।
