नेकपा केन्द्रीय सचिवालयको बैठक बुधबार अपरान्ह सम्पन्न भएको छ । प्रधानमन्त्री केपी शर्मा ओलीको दोस्रो पटक मिर्गौला प्रत्यारोपण (२१ फागुन) भएपछिको यो पहिलो बैठक थियो ।
मंगलबार भएको अध्यक्षद्वय ओली र पुष्पकमल दाहाल प्रचण्ड’ बीचको छलफलपछि आजको बैठक डाकिएको थियो । प्रधानमन्त्री ओलीको दोस्रो मिर्गौला प्रत्यारोपणपछिको यो बैठक अन्य बैठक भन्दा केही अर्थमा भिन्न रहे ।
ओली–प्रचण्डको फरक कुर्सी
केही महिनाअघिका सचिवालय बैठकमा प्रधानमन्त्री समेत रहेका अध्यक्ष ओलीका लागि बैठक कक्षमा छुट्टै कुर्सी राखिएको हुन्थ्यो । अर्का अध्यक्ष पुष्पकमल दाहाल ‘प्रचण्ड’ भने सचिवालयका बाँकी सदस्यहरुसँगै सोफामा बस्ने गरेका थिए । सरकारी निवासमा आयोजित बैठकमा ‘अर्का अध्यक्ष प्रचण्डलाई होच्याएजस्तो देखिने गरी सिट व्यवस्थापन गरेको’ भन्दै पार्टीभित्र ओलीको आलोचना हुन थालेपछि मंसिरयता ओली–प्रचण्डका लागि बालुवाटारमा सँगै रहने गरी सिटको व्यवस्थापन गरिएको थियो ।
तर, मिर्गौला प्रत्यारोपणका कारण नजिकै मानिस रहँदा संक्रमण हुनसक्ने भन्दै चिकित्सकहरुले सचेत गराएका कारण आजको बैठकमा पहिलेजस्तै गरी ओली–प्रचण्ड भिन्दाभिन्दै बसे । प्रधानमन्त्री समेत रहेका ओलीका लागि बैठक कक्षको सबैभन्दा अघिल्तिर छुट्टै विशेष सिटको व्यवस्था गरिएको थियो भने प्रचण्ड स्थायी समितिका अन्य सदस्यहरुसँगै बसेका थिए ।
