आज नारी दिवसको शुभकामना

ती नारीहरुलाई जो सक्षम छन्, स्वास फेर्न

आफूलाई पल–पल लुकाएर, भागेर, ढाकेर, छोपेर

भाग्न पनि कतिदेखि भाग्नु ?

दोबाटोमा ढुक्नेहरुसँग

अंध्यारोमा मौका छोप्नेहरुसँग

एसिड बोकी हिड्नेहरुसँग

अरुको छोरी–चेली बेच्ने र किन्नेहरुसँग

कार्यालयमा गिद्धेनगर लागाउनेसँग, गाडी–मोटरमा टासिन आउनेसँग ?

त्यतिबाट बचेपछि

उसका पाइला–पाइलामा पेरामिटर लगाइएको छ ।

उसको इच्छा, आकांक्षा र सोच सबैमा तगारो सजाईएको छ ।

ऊ, केही कदम आमासँग रोएर, बा को अगाडि मुख–मुखै लागि अटेरी भएर

घरदेखि निस्किन चाहदा उसको ठेक्का समाजले लिएको

नहाँसे, नबोले, घोसे अरे उत्ताउली भन्छन् – देख्दा हाँसेको

घर बसे बेकामे, केही गर्न खोजे भन्छ, पोथी बासेको

कमाएको धनमा पनि शंकाको नजर लगाइन्छ ।

यत्ति सम्पत्ति कसरी कमाउदै–छे ?

भन्छन् धेरै दिनदेखि आधिरातमा घर आउदै छे

प्यारो समाज,

तिम्रो छोरो नि, कामदेखि राति नै फर्किन्छ,

ऊ नी पुरुष मोर्चाको अध्यक्ष त होइन

हिजो तिम्रोमा आपत परेको बेला एम्बुलेन्सलाई फोन गर्दा केटीले नै उठाकी थी, याद छैन ?

हे नर, तिम्रो तेस्रो नेत्र नभएनि मस्तिष्कको पोराहरु खोल

मनमा जे छ, मुखदेखि नी त्यही बोल

सामाजिक सञ्जालमा नारी दिवसको शुभकामना छरेर केही हुन्न ।

 

जबसम्म एउटी नारीलाई पुरुष बराबर ठान्दैनौं,

परिवारको नारीहरुलाई अघि बढाउन मान्दैनौं ।

समाजमा नारी पुरुष बीचको, यो कस्तो भेद्भाव हो ?

जब उ र उसको दाई बसेको कोख त एउटै थियो ।

जुन हातले नारी मुर्ती पुज्दैछ ।

त्यही हातले  नारीको अस्मिता लुट्दै छ ।

शब्दले होइन व्यबहारले नारी दिवस मनाऔं

इज्जत गरौं नारीको तिम्रो घरको होस् कि मेरो

अनि, आफै स्वस्थ रहन्छ समाजको सेरोफेरो ।

 

हे नर, तिमी युग पुरुष बन

एउटी नारीलाई सम्मान गर, आबश्यक अनुसार समर्थन गर

नारी दिवसको शुभकामना – भन् ।