नेपालमा खासगरी वर्तमान सत्तामा अत्यन्त पारदर्शी बन्न पुगेको भ्रष्टाचार तथा ‘कमिशनतन्त्र’को पहिलो शिकार बनेका छन्, गाेकुल बास्काेटा। प्रधानमन्त्री केपी शर्मा ओलीका अत्यन्त निकट, विश्वासपात्र र वफादार बास्काेटाले सञ्चारमन्त्रीका रुपमा एउटा स्वीस कम्पनीको ‘प्रिन्टिङ प्रेस’का प्रतिनिधिसँग त्यसकाे खरिदमा कमिसनको रकमबारे मोलतोल गरेको ‘अडियो’ सामाजिक सञ्जालमा आएपछि उनले राजिनामा दिएका छन्।
मन्त्रीहरुले उठाएको रकम ‘पार्टी’सँगै ‘माथि’सम्म जान्छ भन्ने मान्यता अब विस्तारै आमविश्वासमा परिणत हुन थालेको छ। अख्तियार दुरुपयोग अनुसन्धान आयोग प्रधानमन्त्रीको लाचार छाँया बनेको विश्वास पनि त्यतिकै प्रवल बन्दै गएको छ।
बास्कोटाले मन्त्री पदबाट राजीनामा गरेर यो प्रकरणको अन्त हुँदैन। त्यो रकम कति थियो, कुन रुपमा लेनदेन भयो र त्यो कहाँ गयो, त्यसको विश्वसनीय छानबिन नभएमा प्राय: ‘चाेर’ औंलाहरु माथि अर्थात प्रधानमन्त्रीतर्फ फर्किरहने छन्।
