गायक दीपक बज्राचार्यलाई अचेल भोजभतेर, चाडपर्व र पार्टीमा जाँदा कोही छुटेजस्तो लाग्छ। जमघटमा उनी आफ्ना पुराना साथी खोजिरहेका हुन्छन्। ती छुटेका अनुहार अब काठमाडौंमा भए पो!
ती साथीलाई उनी कि फेसबुकका फोटोमा देख्छन् कि विदेश गएका बेला भेट्छन्।
दीपकको मनमा पनि विदेश बस्ने रहर नपलाएको होइन। तर, दुई-तीन महिनाभन्दा बढी बस्दा उकुसमुकस भएपछि सधैं विदेश बस्ने रहर कहिल्यै भएन। विदेशलाई उनले कन्सर्ट र घुमफिर गर्ने ठाउँकै रूपमा चित्त बुझाए।
सन् २००९ तिर दीपक आफ्नो रिदम ब्यान्डसँग कन्सर्ट गर्न अमेरिकामा थिए। केही नेपाली र केही विदेशी उपस्थित कार्यक्रममा उनले आफ्ना चर्चित गीत सुनाए।
