काठमाडौँ । केपी शर्मा ओली नेतृत्वको वर्तमान सरकार गठन भएसँगै २०७४ फागुन १४ गते अर्थमन्त्रीमा नियुक्त भएका डा. युवराज खतिवडाले त्यसकोे करिब १ महिनापछि अर्थतन्त्रको समग्र स्थितिको अवस्था सार्वजनिक गर्न भन्दै श्वेतपत्र जारी गरे । त्यो श्वेतपत्रको मुख्य सार देशको अर्थतन्त्र ज्यादै नाजुक अवस्थामा छ भन्ने नै थियो । यही कारण प्रमुख प्रतिपक्षी दल काँग्रेसले त्योबेला २०४८ साल र २०७३ सालको आर्थिक सूचकाङ्कको अवस्था सार्वजनिक गरेर त्योबीचमा भएका प्रगति सार्वजनिक समेत गरेको थियो ।
त्यसबेला अर्थमन्त्रीले ल्याएको श्वेतपत्रमा कति राजनीतिक पूर्वाग्रह थियो वा कति वास्तविकता थियो भन्ने छुट्टै बहसको विषय बन्नसक्छ । प्रमुख प्रतिपक्षी दल काँग्रेसले त्यसबेला तथ्यसहित गरेको प्रतिवादको आवश्यकता वा औचित्यबारे अर्को बहस बन्न सक्ला । तर यहाँनिर २ वर्ष अघि अर्थमन्त्री युवराज खतिवडाले नै प्रस्तुत गरेका तथ्याङ्कका आधारमा सरकारको उपलब्धिको संक्षिप्त समीक्षा गर्न मात्रै खोजिएको हो ।
