हामी ब्रम्हाण्डमा छौँ र यही ब्रम्हाण्डबाटै उत्पत्ति भएका हौँ। यो सृष्टि अनादिकालदेखि चलिआएको छ र अनन्तसम्म चलिरहनेछ। पृथ्वी यो व्यापक ब्रम्हाण्डको एउटा उपग्रह हो र यहाँ मानव जातिको विशिष्ट अस्तित्व छ। मानव जातिको विकासक्रमबारे एकै मत छैन र भिन्न मत छन्। विज्ञानको विकासवादी मतले तल्लो जीवजन्तुबाट विकसित हुँदै आएको मान्छ भने हाम्रा धार्मिक मतले ईश्वर तथा परमात्माद्वारा सर्वश्रेष्ठ जीवका रुपमा मानव जातिको सृष्टि भएको मान्छ।
ईश्वर र परमात्माबारे पनि बिभिन्न बुझाइ छन्। कसैले निराकारलाई त, कसैले साकार स्वरुपलाई त, कसैले दुवैलाई ईश्वर मानेका छन्। सत्य, शुद्धता, पवित्रता र प्रज्ञा नै ईश्वर हो। ईश्वर चेतना हो र चेतनाबाटै ऊर्जा र पदार्थको सिर्जना हुन्छ, अर्थात अदृश्यबाट दृश्यको उत्पत्ति भएको मत छ। बुझाइ पनि छ। वास्तवमा मानवको अस्तित्वको निर्माणमा चेतना, ऊर्जा र पदार्थ छ र यसको स्तरअनुसारको रुप, वृत्ति र प्रवृत्ति देखिन्छ। त्यसैले, प्रकृतिको गुणधर्मबारेका कुरा पनि आउँछन्। मानिस समाजमा बस्छ र समाजबाट पनि ऊ प्रभावित हुन्छ। उसको चरित्र र व्यवहार अनि भविष्यका उन्नति पनि उसले बुझ्दै सिक्दै र गर्दै जाँदा हुने परिणाम हुन्। अघिल्ला जन्महरुबाट खराब र असल गुण, धर्म तथा आचरण र व्यवहार आउने कुरा पनि पूर्वीय अध्यात्म दर्शनले भन्छ। वैदिक र बुद्धको बुझाइ यसमा मिल्छ।
