छिमेकी देश चीनका लागि कोरोना भाइरसको संक्रमण अनपेक्षित थियो। वसन्त पर्व धूमधाम मनाउन आ–आफ्ना गृहनगर जान सुरसार गरिरहेका चिनिया जनताका निम्ति मध्य चीनको उहानबाट फैलिएको निमोनिया भयाबह सन्त्रास बन्यो। कोरोना भाइरसबाट हुने निमोनियाले केही मानिसको ज्यान लिएपछि चीन सरकारले तुरुन्तै त्यसको प्रतिरक्षामा सघन बन्दोबस्त ग-यो। संक्रमणको उत्पत्ति थलो उहानलगायत धेरै चिनिया सहर बन्द (लक्ट्ड) वा आंशिक बन्द (सेमी–लक्ट्ड) गरियो। एउटा क्षेत्रलाई धेरै स–साना उपक्षेत्रमा विभाजन गरी त्यहाँको निश्चित मानिसले जिम्मेवारी लिने ग्रिड स्टाइल प्रणालीलाई सघन बनाइयो। नयाँ वर्ष मनाउन गएका स्वास्थ्यकर्मी, मुख छोप्ने मास्क जस्ता संक्रमण रोक्न अत्यावश्यक सामग्री उत्पादन गर्ने कारखानाका मजदूरहरू परिवारसँगको उत्सव छाडेर तत्काल कार्यक्षेत्रमा परिचालन भए। चिनिया जनमुक्ति सेना संक्रमण फैलिएका प्रान्तमा खटिए। कुनै एउटा मिसन ताकेर त्यसका निम्ति अहोरात्र लाग्ने चिनिया राष्ट्रिय स्वभाव यो महामारीको प्रतिरोधमा पनि देखियो।

चीनसामु एकातिर आफ्नै देशमा संक्रमण फैलिनबाट रोक्ने जिम्मेवारी छ अर्कोतिर संक्रमण चीनबाहिर फैलिए यसबापत भोग्नुपर्ने अपजसलाई ध्यानमा राखेर चिनियाहरूले थप सजगता अपनाएका छन्। विश्व स्वास्थ्य संगठनले महामारीको सम्भावित क्षतिलाई आंकलन गरी विश्व स्वास्थ्य आपतकाल घोषणा त ग¥यो तर चीनले देखाएको तदारुकताको प्रशंसा गर्दै सङ्कटकाल घोषणासँग चीनको कुनै सम्बन्ध नभएको बतायो। महामारी नियन्त्रणका लागि ‘ख’ श्रेणीको स्वास्थ्य बन्दोबस्त गर्न विश्व स्वास्थ्य संगठनले माग गरेकामा चीनले ‘क’ श्रेणीको बन्दोबस्त ग¥यो। दस दिनको अन्तरालमा उहानमा दुई विशेष सुविधा सम्पन्न अस्पताल निर्माणले संसारलाई चकित बनायो। चीनको यस्तो सघन तयारी र तदारुकताबीच पनि अहिलेसम्म यो रोग २० देशका २० हजार मानिसलाई संक्रमण भएको छ। मर्नेको सङ्ख्या आठ सय नाघिसकेको छ।