नेपाल अमेरिका पत्रकार संघ (नेजा)ले नेपाल टेलिभिजनका पूर्वमहाप्रबन्धक तथा बरिष्ठ पत्रकार दुर्गानाथ शर्माको निधनप्रति दुःख व्यक्त गरेको छ।

नेजाका कार्यवाहक अध्यक्ष बिकासराज न्यौपाने र महासचिव किरण मरहठ्ठाले जारी गरेको शोक विज्ञप्तिमा उनको निधनले नेपाली पत्रकारिता क्षेत्रमा क्षति पुगेको उल्लेख गरिएको छ।

शर्माको महाराजगञ्जस्थित शिक्षण अस्पतालमा रहेको मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा उपचारका क्रममा आज बिहान निधन भएको हो। उनी मुटु र मिर्गौलासम्बन्धी रोगबाट ग्रसित थिए।

विसं २००४ साल जेष्ठ १४ गते इलाममा जन्मिएका शर्मा विसं २०४२ साल पुष १४ गते नेपाल टेलिभिजनले प्रसारण सुरु गर्दा पहिलो प्रस्तोता रहेका थिए। शर्माले गोरखापत्रको संवाददाता हुँदैं पत्रकारिता सुरु गरेका थिए। शर्माका एक श्रीमती र २ छोरा छन्।