अर्थतन्त्रको मेरुदण्ड भनेकै निजी क्षेत्र हो । देशको अर्थतन्त्र निर्माणमा निजी क्षेत्रको भूमिका महत्वपूर्ण हुन्छ भन्ने कुरालाई सरकारले प्राथमिक रुपमा लिन आवश्यक छ । जुन मुलुकमा धेरै आर्थिक विकास भएको छ, त्यहाँ निजी क्षेत्रले नै नेतृत्व गरेको देखिन्छ ।

रोजगारी सिर्जना गर्ने, कर तिर्ने र कुल गार्हस्थ उत्पादन (जीडीपी) मा महत्वपूर्ण योगदान दिने काम निजी क्षेत्रले गरेको हुन्छ । सरकारको प्राथमिकताभित्र लगानी परेको हुन्छ र त्यो लगानी भित्रायाउन आवश्यक  वातावरण बनाउने वा निजी क्षेत्रलाई अधिकतम आकर्षित गर्न निजी क्षेत्रमैत्री वातावरण सिर्जना गर्ने विषय परेको हुन्छ । 

उद्योग व्यवसायको अहिलेको अवस्था के हो, उद्योगी–व्यवसायीले कत्तिको सम्मान पाएका छन्, यसमा राज्यले सोच्नुपर्ने देखिन्छ । निजी क्षेत्रको जुनसुकै व्यवसायमा पनि सरकारसँग साझेदारी हुन्छ । हरेक सामानको आयातमा सरकारलाई कर तिरेका हुन्छन् । निजी क्षेत्रको आम्दानीको एक तिहाइ हिस्सा निजी क्षेत्रले सरकारलाई बुझाएको हुन्छ । निजी क्षेत्रले यति धेरै योगदान गर्दागर्दै पनि हामी कहाँ छौं, हाम्रो अवस्था के हो भन्ने अवस्था आउनु दुःखद छ ।