संघीय प्रहरी इकाइ कार्यालय सुनसरीमा कार्यरत प्रहरी वरिष्ठ उपरीक्षक (एसएसपी) सौरभ राणा आत्मसमर्पण गरेका छन्। बलात्कार आरोप लागेका एसएसपी राणाले आइतबार दिउँसो जिल्ला प्रहरी कार्यालय सुनसरीमा आत्मसमर्ण गरेका हुन्।

सुनसरीका प्रहरी प्रमुख एसपी यज्ञविनोद पोखरेलका अनुसार राणाविरुद्ध बिहीबार बेलुकी जबरजस्ती करणीको कसूरमा किटानी जाहेरी परेपछि प्रहरीले पक्राउ गर्ने तयारी थालेको थियो।

एसएसपी राणले जिल्ला प्रहरी कार्यालय झापामा डीएसपी हुँदादेखि विर्तामोडकी लिम्बू थरकी विवाहित महिलाले १५ वर्षदेखि डरधम्की दिएर जबरजस्ती करणी गरेको  भन्दै गृह मन्त्रालयमा उजुरी गरेकी थिइन्।

राणा जिल्ला प्रहरी कार्यालय सुनसरी, प्रदेश ट्राफिक प्रहरी कार्यालय इटहरी र संघीय प्रहरी कार्यालय धरानको प्रमुख हुँदा समेत डरधम्की दिएर आफूलाई जबरजस्ती करणी गरेको प्रहरीलाई बयान दिएकी छन्। पीडित महिलाले राणाले आफूलाई डरधम्की दिएर इटहरीको एक होटलमा लगि जबरजस्ती गरेको उजुरीमा उल्लेख गरेकी छन्। 

सोहि उजुरीका आधारमा जिल्ला प्रहरी कार्यालय सुनसरीले घटनास्थलको मुचुल्का तयार गर्न प्रहरी परिचालन गरेको छ। प्रहरी कार्यालय सुनसरीका प्रवक्ता डिएसपी विनोद शर्माका अनुसार पीडित महिलाको वीपी कोइराला स्वास्थय विज्ञान प्रतिष्ठान धरानमा स्वास्थ्य परीक्षण गरिएको छ। 

प्रहरी प्रधान कार्यालयको सिफारिसमा राणालाई गृह मन्त्रालयले बिहीबार निलम्बन गरेको थियो। 

गृह मन्त्रालयले शुक्रबारदेखि लागु हुनेगरी एसएसपी राणालाई निलम्बन गरिएको गृह प्रवक्ता नारायण शर्माले जानकारी दिएका छन्। उनले राणामाथि लागेको आरोपको छानविन गर्न तीन सदस्य छानविन समिति समेत गठन गरिएको बताए। गृहमन्त्रालयले छानविन समितिको नाम गोप्य राखेको छ। 

राणाले भने आफूलाई गृहमन्त्रालयले निलम्बन गरेको विषयमा औपचारिक जानकारी नआएको बताएका छन्।

याे पनि

यौन शोषणको आरोपमा सुनसरीका एसएसपी राणा निलम्बन

जबरजस्ती करणीको अभियोग लागेका एसएसपी राणाविरुद्द पक्राउ पुर्जी