सांस्कृतिक र प्राकृति सम्पदाहरुलाई विश्वभर प्रचारप्रसार गर्ने उद्देश्यसहित भ्रमण वर्षको मुडमा छ देश। २० लाख पर्यटक भित्र्याउने महत्वकांक्षी लक्ष्य। अनि जताततै अभावग्रस्त भौतिक पूर्वाधार। तयारीमा कमी उत्तिकै। यद्यपि, आफ्नो पहिचान विश्वमाझ स्थापित गर्न प्रयत्नशील छ, नेपाल।
यसपटक विश्वभर नेपाललाई चिनाउने जिम्मा दिइएको छ यतीलाई। यती अर्थात् काल्पनिक हिममानव। हालसम्म यतीको अस्तित्वबारे कसैले पुष्टि गर्न सकेको छैन। यतीका पाइला भेटिएका कथनहरु सुनिए पनि। हिउँमा यतिका पाइला भन्दै तस्विरहरु सार्वजनिक भए पनि। तर, विज्ञानले त्यसलाई प्रमाणित गर्न सकेको छैन। सोलुखुम्बुको खुम्जुङ उपत्यकामा रहेको गुम्बामा सिसाको भित्र राखिएको एउटा टाउको छ जसलाई यतीको भनिन्छ तर कसैले त्यसको बैज्ञानिक पुष्टि गरेको छैन।
