मछिन्द्र फुटबल क्लब शहीद स्मारक ए डिभिजन लिगको शीर्ष स्थानमा उक्लिएको छ।
त्रिपुरेश्वरस्थित दशरथ रंगशालामा सोमबार भएको खेलमा थ्री स्टार क्लबलाई २–० गोल अन्तरले पराजित गर्दै मछिन्द्र शीर्ष स्थानमा उक्लिएको हो।
मछिन्द्रको जितमा रेजिन सुब्बा र विशाल राई बीले एक एक गोल गरे।
खेलको ३८ औं मिनेटमा सब्सिच्युड खेलाडी रेजिनले गोल गर्दै मछिन्द्रलाई अग्रता दिलाएका थिए।
त्यसपछि खेलको ९० औं मिनेटमा विशालले गोल गर्दा मछिन्द्र २–० ले विजयी भयो।
जितसँगै मछिन्द्रले ९ खेलमा १९ अंक जोडेको छ।
त्रिभुवन आर्मी क्लबलाई २ अंकले पछि पार्दै मछिन्द्र शीर्ष स्थानमा उक्लिएको हो। दोस्रो स्थानको आर्मीको १७ अंक रहेको छ।
९ खेलमा १४ अंक जोडेको थ्री स्टार चौंथो स्थानमा रहेको छ।