खानेपानी तथा सरसफाइमन्त्री बीना मगरले खानेपानी र सरसफाइ क्षेत्रसँग सम्बन्धित आयोजनालाई कार्यान्वयन गर्न मन्त्रालय अघि बढिरहेको बताएकी छिन्।

बुधबार  मेचीनगर–७ काँकडभिट्टा र दुहागढीमा अवस्थित मानव मलमूत्रीय फोहर प्रशोधन केन्द्रको उद्घाटन गर्दै मन्त्री मगरले जनताको मौलिक हकसँग जोडिएको आयोजनालाई कार्यान्वयन गर्न मन्त्रालय अघि बढिरहेको बताएकी हुन्।

'विशेषगरी तराई क्षेत्रमा देखिएको आर्सेनिकलगायतका समस्या समाधान गर्न खानेपानीका केही ठूला आयोजनाको काम अघि बढाउँदैछौँ', उनले भनिन्, 'तराईमा खानेपानीको समस्या समाधान गर्न केही जिल्ला नै समेट्ने गरी आयोजनाको विस्तृत परियोजना प्रतिवेदन बनाउँदैछौँ।'

नमूना परियोजनाको रुपमा मेचीनगरमा सञ्चालित यी दुई आयोजनाबाट सिकेर मुलुकका अन्य क्षेत्रमा परियोजना विस्तार गरिने मन्त्री मगरको भनाई छ।