नेपाल सरकारले झापाको निर्वाचन क्षेत्र नं ३ र ५ मा फुसको छानो हटाई जस्तापाताको छाना लगाउने कार्यक्रम शुरु गरेको छ।

खर र परालले छाएको फुसको छानो आगलागी तथा अन्य विपत्तिका बेला असुरक्षित हुने भएकाले सरकारले सुरक्षित आवासका लागि सो कार्यक्रम शुरु गरेको हो। 

शहरी विकास मन्त्रालयले गरिब तथा विपन्न समुदायका लागि ‘सुरक्षित नागरिक आवास’ कार्यक्रमअन्तर्गत झापाका ती दुई निर्वाचन क्षेत्रका एक हजार ४०० परिवारको घरमा फुसको छानो हटाएर जस्तापाताको छानो लगाइदिने शहरी विकास तथा भवन निर्माण विभाग सङ्घीय आयोजना कार्यान्वयन एकाइ झापाले जनाएको छ।

गरिब तथा विपन्न समुदायले फुसको छानोमुनि बस्नुपर्ने बाध्यताको अब अन्त्य हुने  कार्यालयका इञ्जिनीयर भूपेन्द्र यादवले बताए। 'निर्वाचन क्षेत्र नम्बर ५ मा हालसम्ममा ३५० घरमा जस्ताको पाता हाल्ने कार्य सम्पन्न भइसकेको छ,' उनले भने, क्षेत्र नम्बर ३ मा लक्षित परिवारको लागत सङ्कलन कार्य हुदैछ।'

उनीहरुलाई दुई किस्तामा अनुदान रकम नगदै प्रदान गरिँदै आएको छ। पहिलो किस्ता जस्तापाता खरिदका लागि रु ३० हजार र दोस्रो किस्ता काम सम्पन्न भइसकेपछि रु २० हजार सम्बन्धित व्यक्तिको बैंक खातामा कार्यालयले जम्मा गरिदिने गरेको यादवको भनाई छ।