जनकपुरधाम : जनकपुरधामको जानकी आँखा अस्पताल नेपाल र भारतका बिरामीहरुका लागि सहज अस्पताल हो। शल्यक्रियादेखि आँखाका विभिन्न रोग उपचार गराउन यहाँ बिरामीको भीड नै लाग्ने गर्छ।
तर पछिल्लो वर्षहरुमा अस्पताल व्यवस्थापनको कमजोरी तथा आन्तरिक किचलोका कारण अस्पतालको सेवा खस्किन थालेको अस्पताल परिसर बाहिरका चश्मा तथा औषधि पसल सञ्चालकहरुले आरोप लगाएका छन्।
उनीहरुले जानकी आँखा अस्पताल सुधार संघर्ष समिति नै गठन गरी आन्दोलन शुरु गरेका छन्। यन्त्र, भौतिक संरचना तथा व्यवस्थापकीय पक्षका कारण अस्पताल धराशायी हुँदै गइरहेको समितिको आरोप छ।
संघर्ष समितिले सोमवार जनकपुरधाममा पत्रकार सम्मेलन गरी अस्पतालमा दक्ष मेडिकल डाइरेक्टर नभएकै कारण अस्पताल धराशायी हुँदै गइरहेको आरोप लगाएको छ।
