गृहमन्त्री रामबहादुर थापा ‘बादल’ले सन् २०३० सम्ममा नेपाललाई सम्वृद्ध मुलुक बनाउने सरकारको तयारी रहेको बताएका छन् ।

नेकपा चाँगुनारायण नगर वडा नम्बर ५ कमिटिले छालिङ्गमा गरेको आयोजना गरेको शुभकामना आदानप्रदान कार्यक्रममा बोल्दै गृहमन्त्री थापाले १० प्रतिशतभन्दा धेरै आर्थिक वृद्धिदर भएमा सन् २०३० सम्ममा नेपाललाई सम्वृद्ध मुलुक बनाउन सकिने बताएका हुन् ।

‘सरकारले १५ औँ पञ्चवर्षीय योजनामा ८ प्रतिशतभन्दा धेरै आर्थिक वृद्धिदर हासिल गर्ने लक्ष्य लिएको छ,’ उनले भने आउने ५ वर्षभित्रमा दोहोरो अंकको वृद्धिदर हासिल गर्ने लक्ष्य रहेको र १० प्रतिशतभन्दा धेरै आर्थिक वृद्धिदर भएमा सन् २०३० सम्ममा नेपाललाई सम्वृद्ध मुलुक बनाउने सरकारको तयारी छ ।

संघीय सांसद महेश बस्नेतले भक्तपुरमा विकास निर्माण तिव्र गतिमा भइरहेको र नेकपाको नेतृत्वमा रहेका स्थानीय सरकारले एउटा वडामा ३ करोड रुपैयाँभन्दा धेरै बजेट विनियोजन गरेको बताएका छन् ।

उनले वर्तमान सरकारले सडक, खानेपानी, स्वास्थ्य, शिक्षालगायतका पूर्वाधार विकासमा जोड दिएको बताए ।