युएईएफए च्याम्पियन्स लिग फुटबल अन्तर्गत समूह चरणको दोस्रो खेलमा डिफेन्डिङ च्याम्पियन लिभरपुलले अस्ट्रियाको क्लब स्लजबर्गमाथि रोमान्चक जित हासिल गरेको छ ।

लिभरपुलको घरेलु मैदानमा सम्पन्न खेलमा लिभरपुलले स्लजबर्गमाथि ४–३ गोल अन्तरले जित हासिल गरेको हो ।

लिभरपुलको जितमा मोहमद सलाहले २ गोल तथा साडियो माने र एन्ड्रयु रोबेर्टसनले समान एक एक गोल गरेका थिए । यता स्लजबर्गका लागि ह्वांग ही चान, टुकुमी मिनामिनो र एर्लिंग ब्राउट हलांडले समान एक एक गोल गरेका थिए ।

खेलको ९ औं मिनेटमा नै लिभरपुलले मानेको गोल मार्फत अग्रता बनाएको थियो । त्यसपछि २५ औं मिनेटमा रोबेर्टसनले गोल गर्दै लिभरपुलको अग्रता २–० मा पुर्याए । खेलको ३६ औं मिनेटमा सलाहले गोल गर्दै अग्रता ३–० बनाए ।

तर खेलको ३९ औं मिनेटमा स्लजबर्गका चानले गोल गरे ।खेलको पहिलो हाफमा ३–१ ले अगाडी रहेको लिभरपुललाई चुनौती दिदै स्लजबर्गले दोस्रो हाफमा थप २ गोल गर्यो ।

खेलको ५६ औं मिनेटमा मिनामिनोले गोल गर्दै स्लजबर्गमाथिको गोल अन्तर ३–२ मा झारे । खेलको ६० औं मिनेटमा फेरि हलांडले गोल गर्दा खेल ३–३ को बराबरीमा पुग्यो । तर त्यसपछि खेलको ६९औ मिनेटमा सलाहले व्यक्तिगत दोस्रो गोल गर्दा लिभरपुलले ४–० को जित हासिल गर्यो ।

यो जितसँगै समूह इ मा रहेको लिभरपुल एक जित एक हारसहित अंक तालिको दोस्रो स्थानमा उक्लिएको छ । पराजित स्लजबर्ग समान जित सहित तोस्रो स्थानमा रहेको छ ।